അഫ്ഗാനിസ്താൻ
വിസ്തീര്ണം : 652,864 ചതുരശ്ര കി.മി. ജനസംഖ്യ : 29,674,000 (2017) അതിര്ത്തി : വടക്ക് തുര്ക്കുമനിസ്താന്, വടക്കു കിഴക്ക് ചൈന, കിഴക്കു തെക്ക് പാക്കിസ്താന്, പടിഞ്ഞാറ്...
ലോക മുസ്ലിം സംഘടനകള് 2
ഉള്ളടക്കം
ലോക മുസ്ലിം സംഘടനകള് മുസ്ലിം സമൂഹത്തിന്റെ മതപരവും സാമൂഹ്യവുമായ അവകാശങ്ങള് സംരക്ഷിക്കുകയും ഐക്യം ശക്തിപ്പെടുത്തുകയും ചെയ്യുന്ന സ്ഥാപനങ്ങളാണ്. വിവിധ രാജ്യങ്ങളിലായി പ്രവര്ത്തിക്കുന്ന ഈ സംഘടനകള് മതകാര്യങ്ങള്, വിദ്യാഭ്യാസം, നിയമപരമായ വിഷയങ്ങള്, മാനവിക സഹായം, സാമൂഹ്യ ബോധവത്കരണം എന്നിവയില് സജീവമായി ഇടപെടുന്നു. അറബ് രാജ്യങ്ങളുടെ സഹകരണ വേദിയായ അറബ് ലീഗ് മുതല് മുസ്ലിം വേള്ഡ് ലീഗ്, മുസ്ലിം സ്കോളേര്സ് തുടങ്ങിയ സംഘടനകളെ പരിചയപ്പെടാം
ഫെഡറേഷന് ഓഫ് യൂനിവേഴ്സിറ്റീസ് ഓഫ് ഇസ്ലാമിക് വേള്ഡ് (FUIW)
വിവിധ ലോകരാഷ്ട്രങ്ങളിലായി പ്രവര്ത്തിക്കുന്ന ഇസ്ലാമിക സര്വ്വകലാശാലകളുടെ അന്താരാഷ്ട്ര കൂട്ടായ്മയാണ് ഫെഡറേഷന് ഓഫ് യൂനിവേഴ്സിറ്റീസ് ഓഫ് ഇസ്ലാമിക് വേള്ഡ് (FUIW). ഇസ്ലാമിക് വേള്ഡ് എഡ്യൂക്കേഷനല്, സയന്റിഫിക് ആന്ഡ് കള്ച്ചറല് ഓര്ഗനൈസേഷന് (ISESCO) കീഴില് 1987 ലാണ് സംഘടന രൂപീകരിച്ചത്. മൊറോക്കോയുടെ തലസ്ഥാനമായ റബാത്ത് ആണ് സംഘടനയുടെ ആസ്ഥാനം.
അംഗ സര്വകലാശാലകളിലെ അക്കാദമിക ഗുണനിലവാരം ഉറപ്പു വരുത്തുക, അധ്യാപക വിദ്യാര്ഥി കൈമാറ്റം പ്രോത്സാഹിപ്പിക്കുക, ഗവേഷണ പഠനങ്ങള്ക്ക് പിന്തുണ നല്കുക എന്നിവയാണ് സംഘടനയുടെ പ്രധാന ലക്ഷ്യങ്ങള്. എല്ലാ മേഖലകളിലും ശാസ്ത്രീയ ഗവേഷണം മെച്ചപ്പെടുത്തുക, അതിന്റെ കണ്ടെത്തലുകള് പ്രസിദ്ധീകരിക്കുക, മുസ്ലിം സമൂഹത്തിന്റെ വികസനപരവും നാഗരികവുമായ ആവശ്യങ്ങളുമായി അവയെ ബന്ധിപ്പിക്കുക, ഖുര്ആനിന്റെ ഭാഷയും ഇസ്ലാമിക സംസ്കാരങ്ങളും പഠിപ്പിക്കുന്നതിനെ പ്രോത്സാഹിപ്പിക്കുക, സമകാലിക പ്രശ്നങ്ങള് പരിഹരിക്കുന്നതിനും മുസ്ലിം സമൂഹത്തിന്റെയും ലോകത്തെമ്പാടുമുള്ള ജനങ്ങള്ക്കിടയിലും സഹവര്ത്തിത്വത്തിന്റെയും സമാധാനത്തിന്റെയും മൂല്യങ്ങള് ഉള്ക്കൊള്ളുന്ന വിദ്യാഭ്യാസ സ്ഥാപനങ്ങളെ വളര്ത്തിയെടുക്കുക, ഇസ്ലാമിക ലോകത്തെ പ്രഗത്ഭരായ പണ്ഡിതരുടെ സംഭാവനകള് പ്രസിദ്ധപ്പെടുത്തുക തുടങ്ങിയവയും സംഘടനയുടെ ലക്ഷ്യങ്ങളാണ്.
ഇന്ത്യയില് നിന്ന് ജാമിഅ മില്ലിയ ഇസ്ലാമിയ, അലിഗഢ് മുസ്ലിം സര്വകലാശാല, ദാറുല് ഹുദാ ഇസ്ലാമിക് യൂണിവേഴ്സിറ്റി, ജാമിഅ നദ്വിയ്യ എടവണ്ണ എന്നീ സര്വകലാശാലകള്ക്കാണ് അംഗത്വമുള്ളത്. ആകെ 193 യൂണിവേഴ്സിറ്റികളാണ് അംഗങ്ങള്.
ഔദ്യോഗിക വെബ്സൈറ്റ്: https://www.fumi-fuiw.org/
മുസ്ലിം വേള്ഡ് ലീഗ് (MWL)
വിശുദ്ധ നഗരമായ മക്ക ആസ്ഥാനമായി പ്രവര്ത്തിക്കുന്ന ഒരു അന്താരാഷ്ട്ര സര്ക്കാറിതര ഇസ്ലാമിക സംഘടനയാണ് മുസ്ലിം വേള്ഡ് ലീഗ്. അറബിയില് റാബിത്വ എന്ന ചുരുക്കപ്പേരില് അറിയപ്പെടുന്ന റാബിത്വത്തുല് ആലമില് ഇസ്ലാമി.
യഥാര്ഥ ഇസ്ലാമും അതിന്റെ തത്ത്വങ്ങളും അവതരിപ്പിക്കുക, മനുഷ്യരെ ഒന്നായി കണ്ട് അവര്ക്കുള്ള സഹായങ്ങളെത്തിക്കുക, വ്യത്യസ്ത സംസ്കാരങ്ങളോടും നാഗരികതകളോടും തുറന്ന മനസ്സോടെ ഇടപെടുക, സമാധാനവും സഹവര്ത്തിത്വവും നിറഞ്ഞ ഒരു ലോകത്തിന്നായി തീവ്രവാദത്തെയും അക്രമണങ്ങളെയും ചെറുക്കുക തുടങ്ങിയവയാണ് മുസ്ലിം വേള്ഡ് ലീഗ് ലക്ഷ്യമിടുന്നത്.
1962 മെയ് 18 ന് മക്കയില് നടന്ന ഇസ്ലാമിക് കോണ്ഫറന്സിന്റെ യോഗത്തില് അംഗീകരിച്ച പ്രമേയത്തിന് അനുസൃതമായണ് മുസ്ലിം വേള്ഡ് ലീഗ് സ്ഥാപിതമായത്. ഐക്യരാഷ്ട്ര സഭയുടെ അഫിലിയേഷനുള്ള ഈ എന്.ജി.ഒ യുടെ നിലവിലെ സെക്രട്ടറി ജനറല് അബ്ദുല്ല ബിന് അബുല് മുഹ്സിന് അത്തുര്കിയാണ്.
സമകാലിക വിഷയങ്ങളില് ഇസ്ലാമിക ശരീഅത്ത് അനുസരിച്ച് വിധി പറയുക, ആഗോള തലത്തില് നടക്കുന്ന ഇസ്ലാമിക പ്രബോധന പ്രവര്ത്തനങ്ങളെ ഏകോപിപ്പിക്കുക, വിശുദ്ധ ഖുര്ആനിനെതിരെയും പ്രവാചകനെതിരെയും നടക്കുന്ന കുപ്രചരണങ്ങളെ അഭിമുഖീകരിക്കുക, പൊതുമാധ്യമ രംഗങ്ങളെ ക്രിയാത്മകമായി ഉപയോഗിക്കുക, ഹജ്ജ്, ഉംറ തീര്ഥാടന സമയങ്ങളില് ക്യാമ്പുകള്, പരിശീലന പരിപാടികള് തുടങ്ങിയവ സംഘടിപ്പിക്കുക, ഫിഖ്ഹ് കൗണ്സിലിന് മേല്നോട്ടം വഹിക്കുക, അറബി ഭാഷയുടെ പ്രചരണങ്ങള്ക്ക് സൗകര്യമേര്പ്പെടുത്തുക, യുദ്ധം, പ്രകൃതി ദുരന്തങ്ങള് മുതലായ ഘട്ടങ്ങളില് അടിയന്തര സേവനങ്ങള് നല്കുക തുടങ്ങിയവയും റാബിത്വയുടെ പ്രധാന ലക്ഷ്യങ്ങളില്പ്പെടുന്നു.
വിവിധ ആവശ്യങ്ങള്ക്കായി എട്ട് അനുബന്ധ സമിതികള് മുസ്ലിം വേള്ഡ് ലീഗിനുണ്ട്. അവ താഴെ.
1. ദ ഫിഖ്ഹ് കൗണ്സില്
2. ദ വേള്ഡ് സുപ്രീം കൗണ്സില്
3. ഹോളി ഖുര്ആന് മെമ്മറേഷന് ഇന്റര് നാഷനല് ഓര്ഗനൈസേഷന്
4. ഇന്റര്നാഷനല് ഇസ്ലാമിക് ഓര്ഗനൈസേഷന് ഫോര് എജുക്കേഷന്
5. മക്ക അല് മുകര്റമ ചാരിറ്റി ചാരിറ്റി ഫൗണ്ടേഷന് ഫോര് ഓര്ഫന്സ്
6. അല് ഹറമൈന് ആന്ഡ് അല് അഖ്സാ മോസ്ക് ഫൗണ്ടേഷന്
7. ദ ഇന്റര് നാഷനല് ഇസ്ലാമിക് റിലീഫ് ഓര്ഗനൈസേഷന്
8. കമ്മീഷന് ഫോര് സയന്റിഫിക് സൈന്സ് ഇന് ഖുര്ആന് ആന്ഡ് സുന്ന.
യുനൈറ്റഡ് നാഷന്സ് ഓര്ഗനൈസേഷന് (UNO), ഓര്ഗനൈസേഷന് ഓഫ് ഇസ്ലാമിക് കോര്പറേഷന് (OIC) എന്നിവയില് നിരീക്ഷക പദവിയും യുനസ്കോ (UNESCO), യൂനിസെഫ് (UNISEF) എന്നിവയില് അംഗത്വവും റാബിത്വയ്ക്കുണ്ട്.
തമിഴ്നാട് മുസ്ലിം മുന്നേറ്റ കഴകം (TMMK)
ജനാധിപത്യ രീതിയില് മുസ്ലിം സമുദായത്തിന്റെ അവകാശങ്ങള് സംരക്ഷിക്കുക എന്ന ലക്ഷ്യത്തില് 1995 ല് കേന്ദ്രീകരിച്ചു സ്ഥാപിതമായ ഒരു സര്ക്കാതിര മുസ്ലിം സംഘടനയാണ് തമിഴ്നാട് മുസ്ലിം മുന്നേറ്റ കഴകം (TMMK). തമിഴ്നാട്ടിലെ എല്ലാ ജില്ലകളിലും നിരവധി ഗ്രാമങ്ങളിലും ടി.എം.എം.കെ യ്ക്കു ശാഖകളുണ്ട്.
ദുരിതാശ്വാസ പ്രവര്ത്തനങ്ങള്, രക്തദാന ക്യാമ്പുകള്, നേത്രദാന ക്യാമ്പുകള്, പാവപ്പെട്ടവര്ക്കുള്ള സൗജന്യ ആംബൂലന്സ് സേവനങ്ങള് തുടങ്ങി ജനസേവന പ്രവര്ത്തനങ്ങളില് ടി.എം.എം.കെ സജീവമാണ്.
2005 ഫെബ്രുവരിയില് അന്നത്തെ മുഖ്യമന്ത്രി ജയലളിതയോട് വഖ്ഫ് ബോര്ഡിന്റെ എല്ലാ ആശയവിനിമയങ്ങളും പള്ളി ഭരണാധികാരികള്ക്ക് തമിഴ്ഭാഷയില് മാത്രം അയക്കാന് ടി.എം.എം.കെ ആവശ്യപ്പെട്ടു. വിദ്യാഭ്യാസ സ്ഥാപനങ്ങളിലെ സീറ്റ് സംവരണത്തിനും സച്ചാര് കമ്മിറ്റിയുടെ ശുപാര്ശകള് പ്രകാരം തമിഴ്നാട്ടിലെ മുസ്ലിംകള്ക്കുള്ള സംരഭകത്വ പദ്ധതികള്ക്കായി ടി.എം.എം.കെ നടത്തിയ പ്രചരണം ഏറെ ശ്രദ്ധ പിടിച്ചു പറ്റിയിരുന്നു.
2009 ന്റെ തുടക്കത്തില് ടി.എം.എം.കെ ‘മനിതനേയ മക്കള്’ എന്ന പേരില് ഒരു പുതിയ രാഷ്ട്രീയ പാര്ട്ടി രൂപീകരിച്ചു. അതേ വര്ഷം നടന്ന തെരഞ്ഞെടുപ്പില് മത്സരിക്കുകയും ചെയ്തു. 2011 ലെ നിയമസഭാ തെരഞ്ഞെടുപ്പില് പാര്ട്ടി എ.ഐ.ഡി.എം.കെയുമായി സഖ്യത്തിലേര്പ്പെട്ടു. മത്സരിച്ച മൂന്നില് രണ്ട് സീറ്റ് നേടുകയും ചെയ്തു.
സംഘടനയുടെ ഔദ്യോഗിക വെബ്സൈറ്റ്: https://www.tmmk.in/
ഇന്റര്നാഷണല് ഇസ്ലാമിക് ഫിഖ്ഹ് അക്കാദമി (IIFA)
ഓര്ഗനൈസേഷന് ഓഫ് ഇസ്ലാമിക് കോ ഓപ്പറേഷന്റെ (ഒ.ഐ.സി) അനുബന്ധ സ്ഥാപനമാണ് ഇന്റര്നാഷണല് ഇസ്ലാമിക് ഫിഖ്ഹ് അക്കാദമി (IIFA). ഇത് ഒരു സാര്വത്രിക പണ്ഡിത സംഘടനയാണ്. 1981 ജനുവരി 25 മുതല് 28 വരെ തീയതികളില് സുഊദി അറേബ്യയിലെ ഫഹദ് രാജാവിന്റെ ആഭിമുഖ്യത്തില് മക്ക അല് മുഖറമയില് നടന്ന സംഘടനയുടെ മൂന്നാം ഇസ്ലാമിക് ഉച്ചകോടിയിലെ പ്രമേയത്തെ തുടര്ന്നാണ് ഇതിന്റെ സ്ഥാപനം. സൗദി അറേബ്യയിലെ ജിദ്ദ ആസ്ഥാനമായാണ് അക്കാദമിയുടെ പ്രവര്ത്തനങ്ങള്. മുസ്ലിം ലോകത്തിന്റെ വിവിധ ഭാഗങ്ങളില് നിന്നുള്ള നിയമ, സാംസ്കാരിക, വിദ്യാഭ്യാസ, ശാസ്ത്ര, സാമ്പത്തിക, സാമൂഹിക വിജ്ഞാന മേഖലകളില് പ്രാവീണ്യം നേടിയ പ്രമുഖ മുസ്ലിം നിയമജ്ഞര്, പണ്ഡിതര്, ഗവേഷകര്, ബുദ്ധിജീവികള് എന്നിവരാണ് ഇതിലെ അംഗങ്ങള്.
ലക്ഷ്യവും ദൗത്യവും
ലോകമെമ്പാടുമുള്ള മുസ്ലിംകള്ക്ക് ആശങ്കയുണ്ടാക്കുന്ന വിഷയങ്ങളില് ശരീഅത്തിന്റെ വിധികളും വ്യവസ്ഥകളും പൂര്ണ സ്വാതന്ത്ര്യത്തോടെയും വിശുദ്ധ ഖുര്ആനിന്റെയും നബി(സ്വ)യുടെ സുന്നത്തിന്റെയും അടിസ്ഥാനത്തില് വിശദീകരിക്കുക എന്നതാണ് അക്കാദമിയുടെ പ്രധാന ചുമതല.
ഇസ്ലാമിക പൈതൃകത്തില് നിന്ന് ഉരുത്തിരിഞ്ഞതും ഇസ്ലാമിക ചിന്തയുടെ വികാസത്തിന് തുറന്നതുമായ പരിഹാരങ്ങള് നല്കുകയെന്ന ലക്ഷ്യത്തോടെ ആധികാരികവും ഫലപ്രദവുമായ ഇജ്തിഹാദ് നടത്തല് അക്കാദമിയുടെ പ്രവര്ത്തനങ്ങളില്പ്പെട്ടതാണ്.
നാല് പതിറ്റാണ്ടുകളായി സമകാലിക പ്രശ്നങ്ങള്, ദുരന്തങ്ങള്, മറ്റു സംഭവവികാസങ്ങള് എന്നിവയുമായി ബന്ധപ്പെട്ട് 238 പ്രമേയങ്ങള് ഇതിനകം അവതരിപ്പിച്ചിട്ടുണ്ട്.
മുസ്ലിംകളുടെ പ്രശ്നങ്ങളില്, ശരീഅത്തിന്റെ (നിയമവിധികള്) നിലപാടുകള് വ്യക്തമാക്കുന്നതിനും സമകാലിക ജീവിത പ്രശ്നങ്ങള്ക്ക് ഉചിതമായ പരിഹാരം നല്കുന്നതിനുമായി ആദ്യത്തെ ആഗോള നിയമപരമായ റഫറന്സായി മാറാന് അക്കാദമി ലക്ഷ്യമിടുന്നു.
ഇസ്ലാം അതിന്റെ ഉത്ഭവം, ഉറവിടങ്ങള്, ലക്ഷ്യങ്ങള്, നിയമങ്ങള്, വിധികള് എന്നിവയുമായി ബന്ധപ്പെടുത്തി ഇസ്ലാമിക ശരീഅത്തെ കൃത്യവും മിതവുമായി അവതരിപ്പിക്കുകയും അതിന്റെ ഗുണങ്ങളും ജീവിത പ്രശ്നങ്ങളെ അഭിമുഖീകരിക്കാനുള്ള അതിന്റെ പൂര്ണമായ കഴിവും ഉയര്ത്തിക്കാട്ടുകയും സമഗ്രവും സംയോജിതവുമായ ആശയത്തിന് അനുസൃതമായി മനുഷ്യന് ഇഹത്തിലും പരത്തിലും സന്തോഷവും സ്ഥിരതയും സുരക്ഷിതത്വവും ഉറപ്പു വരുത്തുക എന്നതാണ് ഈ സംരഭത്തിന്റെ ദൗത്യം.
അക്കാദമിയുടെ കീഴില് അക്കാദമിയുടെ സെക്രട്ടറി ജനറലിന്റെ കാബിനറ്റ് എസ്ജിയുടെ പ്രത്യേക ഉപദേഷ്ടാവ്, എസ്ജിയുടെ കാബിനറ്റിന്റെ സൂപ്പര്വൈസര്, ഫത്വ ഒബ്സര്വേറ്ററി ആന്ഡ് റിവ്യൂസിന്റെ സൂപ്പര്വൈസര്, ഇന്റേണല് ഓഡിറ്റര് എന്നിവരാണുള്ളത്.
പ്ലാനിംഗ്, ഡവലപ്മെന്റ്, ഇന്റര്നാഷണല് കോ-ഓപ്പറേഷന്, ആര്ക്കൈവ്സ്, ഫോളോ-അപ്പ് ഡിപ്പാര്ട്ട്മെന്റ്, കുടുംബം, സ്ത്രീ, ബാല്യം, വയോജനങ്ങളുമായി ബന്ധപ്പെട്ട വിഭാഗങ്ങള്, അഡ്മിനിസ്ട്രേറ്റീവ് ആന്റ് ഫിനാന്ഷ്യല് അഫയേഴ്സ് ഡിപ്പാര്ട്ട്മെന്റ്, മീഡിയ, പബ്ലിക് റിലേഷന്സ്, ഇന്ഫര്മേഷന് ആന്റ് കമ്മ്യൂണിക്കേഷന് ടെക്നോളജി, ധനസഹായം, നിക്ഷേപം, പദ്ധതികള്, ഡിപ്പാര്ട്ട്മെന്റ് ഓഫ് റിസര്ച്ച്, സ്റ്റഡീസ്, ഫത്വ്വ, എന്സൈക്ലോപീഡിയകള്, വിവര്ത്തനം, അച്ചടി കൂടാതെ പ്രിന്റിംഗ് ആന്ഡ് പബ്ലിഷിംഗ് വിഭാഗവും പ്രവര്ത്തിക്കുന്നു.
ഓര്ഗനൈസേഷന് ഓഫ് ഇസ്ലാമിക് കോര്പറേഷന്റെ ഓരോ അംഗരാജ്യവും അക്കാദമിയെ പ്രതിനിധീകരിക്കാന് ഒരു സജീവ അംഗത്തെ നിയമിക്കണമെന്ന് ഫിഖ്ഹ് അക്കാദമിയുടെ ചട്ടങ്ങള് അനുശാസിക്കുന്നുണ്ട്. ഒരു രാജ്യത്ത് നിന്ന് ഒന്നിലധികം സജീവ അംഗങ്ങളെ ഉള്പ്പെടുത്താനും സാധിക്കും.
കൗണ്സില് തീരുമാനമനുസരിച്ച്, അംഗത്വ വ്യവസ്ഥകള് നിറവേറ്റുന്നവരെയും, മുസ്ലിം രാജ്യങ്ങളില് നിന്നുള്ള പണ്ഡിതന്മാരെയും നിയമജ്ഞരെയും, അമുസ്ലിം രാജ്യങ്ങളിലെ മുസ്ലിം പ്രതിനിധികളെയും, അക്കാദമിയുടെ ലക്ഷ്യങ്ങള് നിറവേറ്റുന്ന ഇസ്ലാമിക സംഘടനകളെയും ഉള്പ്പെടുത്താം.
ഇന്റര്നാഷണല് ഇസ്ലാമിക് ഫിഖ്ഹ് അക്കാദമിയില് 57 അംഗരാജ്യങ്ങളാണുള്ളത്. അവ ഓര്ഗനൈസേഷന് ഓഫ് ഇസ്ലാമിക് കോ-ഓപ്പറേഷനിലും അംഗങ്ങളാണ്.
അസര്ബൈജാന്, ജോര്ഡാന്, അഫ്ഗാനിസ്താന്, അല്ബേനിയ, ഉസ്ബെകിസ്താന്, ഉഗാണ്ട, യു.എ.ഇ, ഇന്തോനേഷ്യ, ഇറാന്, പാക്കിസ്താന്, ബഹറൈന്, ബ്രൂണൈ, ബംഗ്ലാദേശ്, ബെനിന്, ബുര്കിന ഫാസോ, തുര്കുമാസ്താന്, തുര്ക്കി, ചാഡ്, ടോഗോളസ്, തുണീഷ്യ, അള്ജീരിയ, ജിബൂട്ടി, സൗദി അറേബ്യ, സെനഗല്, സുഡാന്, സിറിയ, സുറിനാമെ, സേറ ലിയോന്, സോമാലിയ, താജിക്സ്താന്, ഇറാഖ്, ഒമാന്, ഗാബോണ്സ്, ഗാംബിയ, ഗുയാന, ഗുയ്നിയ, ഗുയ്നിയ ബിസ്സാഉ, ഫലസ്തീന്, കോമൊറോസ്, കിര്ഗിസ്, കസാഖിസ്താന്, കാമറോണ്, കോട്ട് ഡിവോര്, കുവൈറ്റ്, ലബനാന്, ലിബിയ, മാല്ദീവ്സ്, മാലി, മലേഷ്യ, ഈജിപ്ത്, മൊറോക്കോ, മൗറിത്താനിയ, മൊസാമ്പിക്, നൈജര്, നൈജീരിയ, യമന് തുടങ്ങിയവയാണ് ഇതിലെ അംഗരാജ്യങ്ങള്.
https://iifa-aifi.org/en
ഇന്ത്യ ഇസ്ലാമിക് കള്ച്ചറല് സെന്റര്, ഡല്ഹി
പ്രശസ്ത ഇസ്ലാമിക പണ്ഡിതനും വിദ്യാഭ്യാസ വിചക്ഷണനുമായ ഡോ. സയ്യിദ് ഹമീദിന്റെ നേതൃത്വത്തിലുള്ള ഒരു കൂട്ടം ദാര്ശനികര് 1984-ല് ആരംഭിച്ചതാ?് ഇന്ത്യ ഇസ്ലാമിക് കള്ച്ചറല് സെന്റര് (കകഇഇ). ഡല്ഹിയിലെ ഹൃദയഭാഗത്ത് ലോധി ഗാര്ഡന്സിനടുത്താണിതിന്റെ കേന്ദ്രം. പ്രധാനമന്ത്രിയായിരുന്ന ഇന്ദിരാഗാന്ധിയാണ് 1984 ആഗസ്റ്റ് 24-ന് ഈ മഹത്തായ സ്ഥാപനത്തിന്റെ തറക്കല്ലിട്ടത്.
വിശ്വാസം, ജാതി, മതം, നിറം എന്നിവ പരിഗണിക്കാതെ മാനുഷിക മൂല്യങ്ങളില് ഊന്നിനിന്നുകൊണ്ട് ഈ രാജ്യത്തെ ജനങ്ങള്ക്കിടയില് പരസ്പര ധാരണയും സൗഹാര്ദവും പ്രോത്സാഹിപ്പിക്കുകയും സഹിഷ്ണുതയും ഉദാരവും പുരോഗമനപരവും യുക്തിസഹവുമായ ഇസ്ലാമിന്റെ യഥാര്ഥ മുഖം പരിചയപ്പെടുത്തുകയും ചെയ്യുക എന്നതാണ് ഇന്ത്യാ ഇസ്ലാമിക് കള്ച്ചറല് സെന്ററിന്റെ പ്രധാന ലക്ഷ്യം
മസ്ജിദ്, ലൈബ്രറി, ഓഡിറ്റോറിയം എന്നിവ നിര്മിക്കുന്നതില് ശ്രദ്ധ കേന്ദ്രീകരിച്ചു കൊണ്ടാണ് സെന്ററിന്റെ പ്രവര്ത്തനം തുടങ്ങിയത്. ഇസ്ലാമിക കല, സാഹിത്യം, വിദ്യാഭ്യാസം എന്നിവ പ്രോത്സാഹിപ്പിക്കുന്നതിന് സെന്റര് വിവിധ സാംസ്കാരിക പരിപാടികള്, സെമിനാറുകള്, ശില്പശാലകള് എന്നിവയും സംഘടിപ്പിച്ചു.
1990 കളില് ഐഐസിസി അതിന്റെ പ്രവര്ത്തനങ്ങള് വിപുലീകരിക്കുകയും ഒരു സ്കൂളും കോളേജും ഉള്പ്പെടെ നിരവധി വിദ്യാഭ്യാസ സ്ഥാപനങ്ങള് സ്ഥാപിക്കുകയും ചെയ്തു. ഇസ്ലാമിക പഠനങ്ങളിലും ഗവേഷണങ്ങളിലും ശ്രദ്ധ കേന്ദ്രീകരിക്കുന്ന ഒരു ഗവേഷണ വിഭാഗവും സെന്റര് സ്ഥാപിച്ചു.
2000-കളില്, കകഇഇ വിപുലമായ നവീകരണത്തിനും മാറ്റങ്ങള്ക്കും വിധേയമായി. സാംസ്കാരിക ഉത്സവങ്ങള്, കലാപ്രദര്ശനങ്ങള്, അന്താരാഷ്ട്ര സമ്മേളനങ്ങള് എന്നിവയുള്പ്പെടെ പുതിയ പരിപാടികളും പ്രവര്ത്തനങ്ങളും കേന്ദ്രം അവതരിപ്പിച്ചു തുടങ്ങി.
സമീപ വര്ഷങ്ങളില്, ഐഐസിസി ഏറെ വളരുകയും വികസിക്കുകയും ചെയ്തു. അന്താരാഷ്ട്ര സംഘടനകളുമായും സ്ഥാപനങ്ങളുമായും പങ്കാളിത്തം സ്ഥാപിക്കാനും വിദേശ പ്രമുഖരുടെയും പണ്ഡിതന്മാരുടെയും സന്ദര്ശനങ്ങള് ഉള്പ്പെടെ നിരവധി പരിപാടികള്ക്ക് ആതിഥേയത്വം വഹിക്കാനും സെന്ററിനായിട്ടുണ്ട്
നിലവില് ആയിരക്കണക്കിന് വിശ്വാസികളെ ഉള്ക്കൊള്ളാന് കഴിയുന്ന മനോഹരമായ മസ്ജിദ്, ഇസ്ലാമിക സാഹിത്യം, പുസ്തകങ്ങള്, കൈയെഴുത്തുപ്രതികള് എന്നിവയുടെ ശേഖരമുള്ള വിശാലമായ ലൈബ്രറി, കോണ്ഫറന്സുകള്, സെമിനാറുകള്, സാംസ്കാരിക പരിപാടികള് എന്നിവയ്ക്കായി വിശാലമായ ഓഡിറ്റോറിയം, ഇസ്ലാമിക കല, കാലിഗ്രാഫി, പ്രദര്ശനങ്ങള് എന്നിവ പ്രദര്ശിപ്പിക്കുന്ന ഒരു ആര്ട്ട് ഗാലറി, ഒരു സ്കൂളും കോളേജും ഉള്പ്പെടെ വിവിധ വിദ്യാഭ്യാസ സ്ഥാപനങ്ങള് എന്നീ സംരഭങ്ങള് ഈ സെന്ററിനു കീഴിലായി നടന്നു വരുന്നു.
Reference:
https://www.iiccentre.com/
കിംഗ് ഫൈസല് സെന്റര് ഫോര് ഇസ്ലാമിക് സ്റ്റഡീസ്
ഇസ്ലാമിക ലോകത്തെ വൈജ്ഞാനിക മുന്നേറ്റത്തിന് ഊന്നല് നല്കിക്കൊണ്ട് 1983-ല് രൂപീകരിച്ച ഒരു സംഘടനയാണ് കിംഗ് ഫൈസല് സെന്റര് ഫോര് ഇസ്ലാമിക് സ്റ്റഡീസ്. ഇതിനു കീഴില് നാല് ബൃഹദ് ലൈബ്രറികളും ഒരു മാനുസ്ക്രിപ്റ്റ് പ്രിസര്വേഷന് ലബോറട്ടറിയും പ്രിന്റിങ് പ്രസ്സും കിംഗ് ഫൈസല് ഗാലറിയുമുണ്ട്. ലൈബ്രറി സൗകര്യങ്ങള് സൗജന്യമാണ്. നിരവധി പ്രഭാഷണങ്ങളും സിമ്പോസിയങ്ങളും ഇസ്ലാമിക പൈതൃകം വിളിച്ചോതുന്ന പ്രദര്ശനങ്ങളും സെന്റര് സംഘടിപ്പിക്കാറുണ്ട്.
നിരവധി ദൗത്യങ്ങള് ഏറ്റെടുത്തു കൊണ്ടാണ് കിംഗ് ഫൈസല് സെന്റര് ഫോര് ഇസ്ലാമിക് സ്റ്റഡീസ് പ്രവര്ത്തിക്കുന്നത്. സുഊദിയിലെ ഫൈസല് രാജാവിന്റെ രക്തസാക്ഷിത്വത്തിന് എട്ട് വര്ഷത്തിന് ശേഷം കിംഗ് ഫൈസല് ഫൗണ്ടേഷന് (KFF), കിംഗ് ഫൈസല് സെന്റര് ഫോര് റിസര്ച്ച് ആന്ഡ് ഇസ്ലാമിക് സ്റ്റഡീസ് (KFCRIS) എന്നിവ സ്ഥാപിച്ചു. സൗദി അറേബ്യയും ലോകത്തിന്റെ മറ്റു ഭാഗങ്ങളും തമ്മിലുള്ള അറിവ് കൈമാറുന്നതിന്നായി KFCRIS ഒരു പ്രമുഖ അക്കാദമിക്, ബൗദ്ധിക, സാംസ്കാരിക കേന്ദ്രമായി പ്രവര്ത്തിക്കുന്നു.
ഇസ്ലാമിനും മുസ്ലിംകള്ക്കും വേണ്ടി സേവനം ചെയ്ത ഇസ്ലാമിക പ്രവര്ത്തകര്ക്കും പ്രബോധകര്ക്കും അതോടൊപ്പം മാനവിക താല്പര്യത്തിന് ഗുണകരമായ തരത്തില് ഗവേഷണം നടത്തുന്നവരുമായ വ്യക്തിത്വങ്ങള്ക്കും ഓരോ വര്ഷവും കിംഗ് ഫൈസല് അവാര്ഡ് നല്കിവരുന്നു. കഴിവും പ്രാഗത്ഭ്യവും മാത്രമാണിതിന്റെ മാനദണ്ഡം. എത്രത്തോളമെന്നാല് കിംഗ് ഫൈസല് ഇന്റര്നാഷണല് പ്രൈസ്(കെ എഫ് ഐ പി) നേടിയ ഒമ്പതുപേരെ അതേ പ്രവര്ത്തനത്തിന് നോബേല് സമ്മാനത്തിന് തെരഞ്ഞെടുക്കുകയുണ്ടായി ഫിസിക്സസിലും കെമിസ്ട്രിയിലും 2001ലെ നോബേല് സമ്മാനം നേടിയ ആറില് നാലുപേരും കെ എഫ് ഐ പി നേടിയവരായിരുന്നു.
ഹ്യുമാനിറ്റീസ്, സോഷ്യല് സയന്സസ് എന്നിവയില് ഗവേഷണം നടത്തുന്നതിനും ബൗദ്ധിക ചര്ച്ചകളിലും സാംസ്കാരിക സംഭാഷണങ്ങളിലും ഏര്പ്പെടുന്നതിനും പ്രാദേശിക ആഗോള ഗവേഷകരെയും ഗവേഷണ സംഘടനകളെയും ഒരുമിച്ചുകൂട്ടുക എന്നതാണ് കിംഗ് ഫൈസല് സെന്റര് നിര്വഹിക്കുന്ന ദൗത്യങ്ങളില് മറ്റൊന്ന്. അതിലുപരിയായി പബ്ലിഷിംഗ് ഹൗസ്, ലൈബ്രറി, ആര്ക്കൈവുകള്, മ്യൂസിയം തുടങ്ങി വൈവിധ്യമാര്ന്ന ഉത്തരവാദിത്തങ്ങള് വഹിച്ചു വരുന്നു.
കിംഗ് ഫൈസല് സെന്ററിന്റെ പ്രസിദ്ധീകരണ വിഭാഗമായ അല് ഫൈസല് കള്ച്ചറല് ഹൗസ്, രാജ്യത്തിനും അറബ്, മുസ്ലിം സമൂഹങ്ങള്ക്കും നിരവധി പുസ്തകങ്ങള് കൂടി സംഭാവന ചെയ്തിട്ടുണ്ട്. കൂടാതെ കിംഗ് ഫൈസല് സെന്റര് ലൈബ്രറി, ഗവേഷകരെ സഹായിക്കുന്നതിന് വിവിധ സേവനങ്ങള് നല്കുന്നുണ്ട്.
സംഘടനയുടെ ഔദ്യോഗിക വെബ്സൈറ്റ്: https://www.kfcris.com/en
